Tweet
راني بين يدك يا مولاي
آش تحب تعمل فيَّ
حامل ذنبي ثقيل من موراي
قاصد رحمتك اعطف عليَّ
وحش الغفلة شدّني مزيان
لْجامو واعره شيطانيه
ما خلّى للروح من آمان
قلبي مات يا ندايميّا
قلبي عْمى وزاد اللسان
مايذكرشِ رب البريّة
اعصات يدي و زلت الاقدام
يا ندامتي زنَت عينيّا
اعصيت الله و خَف الميزان
تْقاضى زادي ،طْفات شمسيّا
سْمايا كحالت بالغيام
ليل حالك دون صبحية
ماشي وحدي تايه ولهان
ماندري شرقي من غربيّا
دمعت عيني دمع الندمان
دمع سخون على جفنيّا
****
أنا لي بغيت هذا الحال
قصرت في حق الله عَليّا
نعست الليل و ما طال
وإبليس الملعون عشّش فيّا
كيف ندير يا ربي مولاي
لو كان تطردني من المحمديّة
نخلد في نار جهنم
ينحرق وجهي و اعظاميّا
آش نقول لرسول السلام
يوم الحوض، ما ينظر فيا
يقول لي ،ليه يافولان
ماحافظش على عهديّا
جاك كلامي والقرآن
واضح كي شمس العشية
نْقول ليه يا حبيب الرحمان
يا رحيم يا سيد الأنبيا
صلّى الله عليك و ما زال
نفديك بعمري و عَينيّا
شوف فيّا و ارحم هدا الحال
بجاه للاّ فطوم الزهرية
و بجاه أولادها و الإمام
آل بيتك و البكرية
يا ربي ارحمني يا رحمان
و اغفر ذنبي و توب عليّا
نشهد أنك الواحد الديان
و محمد رسول للبشرية
صلِّ و سلم عليه يا مولاي
كل ما ذكرك ذاكر في الخفية
وعلى آله و اصحاب الديوان
رجال الله سادتي الصوفية