Annonce
Réduire
Aucune annonce.
Ait Menguellet ...Asfru n amedah
Réduire
X
-
Aït Menguellet, Ay aqbayli ...(Ô kabyle ALgerien)
Taqsiṭ-agi d aqeṣṣer
Wiss ma teḍra neɣ ad-teḍru
Kul yiwen akken la iheddeṛ
Γef tmurt tug’ ara d-teḥlu
Nettmenni nebɣa an-nẓer
Yiw’ wass lukan ad-tefru
Abeṛṛani ad-iwexxeṛ
Tamurt yid-s ara d-nelhu
Dɣa ger-aneɣ ad-tekker
Nekʷni s Leqbayel ntettu
Alamma nsawel ad-yehḍeṛ
I ubeṛṛani ad-aɣ-yefru
Kul yiwen akken la iheddeṛ
Awal yuɣal d asefru
Asmi yeffeɣ ubeṛṛani
Tamurt teggʷra-d s' arraw-is
Yefṛeḥ m'kul d aqbayli
Yenwa ğğuğğgen-d ussan-is
Yekfa lfeṛḥ dayenni
Kul wa yers-d ɣ' leεqel-is
Tura tamurt-agi
Ilaq a s-d-naf ixef-is
Tamurt teḥkem s’ lḥeqq
Tefka-d yiwen d mmit-neɣ
Fell-as akkʷ i nwufeq
Ad-yettsewwiq fell-aneɣ
M'kul lεeṛc yenṭeq
Yenna-d win mači seg-neɣ
Fiḥel a ntezzi a ntenneḍ
Kkset-d an-εiwdet wayeḍ
Leεṛac mwafaqen
Sbedden-d argaz am wakka
Yeẓwer yefhem yessen
Am win ur t-ttafen ara
Dɣa ayt tuddar neṭqen
Nnan-d ur t-nessin ara
Fiḥel a ntezzi a ntenneḍ
Kkset-d an-εiwdet wayeḍ
Tuddar nudant seg-ul
Ufant argaz lkayes
Γeṛ tidett i yettmuqul
Di lḥeqq mači ad-yessenɣes
Tekker-d taddart teggul :
Argaz-agi ar d-yettwakkes
Fiḥel a ntezzi a -ntenneḍ
Kkset-d an-εiwdet wayeḍ
Taddart teggul ad-taf
Alarmi tnuda tufa
Win id-sbedden yufaf
Yezmer i m'kul tilufa
Yekker-d udrum s zzεaf
Yenna-d ur t-neqbil ara
Fiḥel a ntezzi a ntenneḍ
Kkset-d an-εiwdet wayeḍ
Yekker-d udrum yemjamal
Yebda ameyyez di lɣaci
Yextaṛ bab n wuzzal
Ttqadaren medden irkʷelli
Yekker-d gma-s ɣ' ccwal :
Amek tenwiḍ tifeḍ-iyi ?
Fiḥel a ntezzi a ntenneḍ
Kkset-d an-εiwdet wayeḍ
Tura ur d-yeqqim lefhem
Tṣubb s' anga ur d-tettali
Anw' i ilaq ad-yeḥkem …
M'ur d-yi-tqebblem nekkini ?
Anw' i ilaq ad-yeḥkem …
M'ur k-nqebbel keččini ?
Teẓram amek a nexdem
A s-nsiwel i ubeṛṛani
Aṭas n wi' ara d-as-yinin
Leflani la ɣ-yessefcal
Widak d wid ur nessin
Amek i la teddun lecɣal
Uqbel ad-tẓeṛεeḍ timẓin
Ẓer qbel amek i yegga wakal
Ay Aqbayli
Ireffden abeṛṛani
Ay Aqbayli
Yettağğan gma-s yeɣli
Yeğğa-as-d baba-s cci
Ur yeẓri d acu yesεa
Dɣa ad-yeḥkem fell-i
Ma d-as-neqbel annect-a ?
Awal-is ur yettεeddi
Nettruẓu leεmer nekna
Amek baba-s d ameksa
Ass-a d netta ad-yi-ḥekmen
Mi yekker zzehr-is yeɣṛa
Tura yerfed-d s' wallen
Dɣa awal-is ma iεedda
Cclaɣem-agi ad-ttwakksen
S' nnig-neɣ ḥedd ur yelli
La ntettu i diri-aɣ
Igenni-nneγ ad-yefk itri
A t-id-nerr d aεdaw fell-aɣ
A t-neğğ kan ad- yeflali
Ad-nekker yid-s a nennaɣ
dz(0000/1111)dz
Commentaire